එළුවන් කෑම

මේ වැල මොකදෝ දම් වැල
මේ වැල මොකදෝ කිරි වැල
මේ වැල මොකදෝ කිදි වැල
මේ වැල මොකදෝ මදු වැල 

උඩින් පනින්දෝ - තල්ල කැඩෙයි දෝ
යටින් රිංගන්දෝ - කිඩොල් ඇනෙයි දෝ 

කුරුළු කූඩු කූඩු දුටින් - අපි දුටු කූඩුවක් නැතී
ගිරා කූඩු කූඩු දුටින් - අපි දුටු කූඩුවක් නැතී
ලේන් කූඩු කූඩු දුටින් - අපි දුටු කූඩුවක් නැතී
කපුටු කූඩු කූඩු දුටින් - අපි දුටු කූඩුවක් නැතී 

ගෙයි ගොම ගාලා ගත් මගෙ එළුවා
නුඹට කොයින්දෝ අපගේ එළුවා
දරණුව දීලා ගත් මගෙ එළුවා
නුඹට කොයින්දෝ අපගේ එළුවා

අප්පා දීලා ගත් මගෙ එළුවා
නුඹට කොයින්දෝ අපගේ එළුවා
අයියා දීලා ගත් මගෙ එළුවා
නුඹට කොයින්දෝ අපගේ එළුවා 

ඉරගල දීලා ගත් මගෙ එළුවා
නුඹට කොයින්දෝ අපගේ එළුවා
සඳගල දීලා ගත් මගෙ එළුවා
නුඹට කොයින්දෝ අපගේ එළුවා 

එළුවන් කන්නයි මං ආවේ
එළු බෙටි කාපන් තුන්තීරේ
සාවුන් කන්නයි මං ආවේ
සා බෙටි කාපන් තුන්තීරේ 

ගෝනුන් කන්නයි මං ආවේ
ගොන් බෙටි කාපන් තුන්තීරේ
මුවන් කන්නයි මං ආවේ
මුව බෙටි කාපන් තුන්තීරේ 

මේ පුටු කාගේ  -  බණ්ඩාරේ
මේ ඇඳ කාගේ  -  බණ්ඩාරේ
මේ බත් කාගේ  -  බණ්ඩාරේ
මේ කැඳ කාගේ  -  බණ්ඩාරේ 

මේ පුටු ඉන්දෝ - ඉන්න නොදෙන්දෝ
මේ ඇඳ ඉන්දෝ - ඉන්න නොදෙන්දෝ
මේ බත් කන්දෝ -  කන්න නොදෙන්දෝ
මේ කැඳ බොන්දෝ - බොන්න නොදෙන්දෝ 

එළුවා කපා අපේ ගෙටයි ඒ බඩවැල් තොපේ ගෙටයි
සාවා කපා අපේ ගෙටයි ඒ බඩවැල් තොපේ ගෙටයි
ගෝනා කපා අපේ ගෙටයි ඒ බඩවැල් තොපේ ගෙටයි
මුවා කපා අපේ ගෙටයි ඒ බඩවැල් තොපේ ගෙටයි 

බුලත් කොටඤ්ඤං රළහාමි දෙනවද එළුවා
කොච්චර කෙටුවත් රළහාමි නොදෙමිය එළුවා 

වැල්ලේ දුවන්නන් රළහාමි දෙනවද එළුවා
කොච්චර දිව්වත් රළහාමි නොදෙමිය එළුවා 

හොඳට නටන්නන් රළහාමි දෙනවද එළුවා
කොච්චර නැටුවත් රළහාමි නොදෙමිය එළුවා 

කොච්චි කොටඤ්ඤං රළහාමි දෙනවද එළුවා
කොච්චර කෙටුවත් රළහාමි නොදෙමිය එළුවා 

දණින් වදිඤ්ඤං රළහාමි දෙනවද එළුවා
කොච්චර වැන්දත් රළහාමි නොදෙමිය එළුවා 

පන් කර්මාන්තය ආශ්‍රිත ජන කවි

ගෙනත් එපන් අව්වේ ලා වේළ                     මින
නොබා පන් ඉරති අඟනෝ වෙනින්            වෙන
සුබා මුල්ල පුරමින් පන් මිටක්                    ගෙන
දෙපන් රටා වෙනවත් යන්තම්                ගොතන 

පුරා කොනින් ලද පැදුරක්                    පුරන්නේ 
ඉරා එපන් ගෙන සායන්                   පොවන්නේ
සරා මල් පෙතිත් වට කර                     වියන්නේ
රටා පියුන් පන්නන් පත්                      වියන්නේ 

ගාන තෙල් සඳුන් වරලස ඔමරි                   කොට 
මුහුණ පුරා තෙල් ගාගෙන යන                    කලට 
මන බලති මිනුවන් පන් තිබෙන                 කොට
නෑනො නුඹත් එනවද පන්                 නෙළන්නට 

ඉසට පියුම්ලා කොට්ටේ                        වියඤ්ඤා
පයට පියුම්ලා කොට්ටේ                        වියඤ්ඤා
මැදට ඇඳ රටා අස්පැන්                         වියඤ්ඤා
නෙතට සතර මුල් අරදග                       වියඤ්ඤා

ඉර හඳ පාන විල කොතනද                   තුන්හිරියා 
ඉර හඳ පාන විල මෙතනයි                    තුන්හිරියා
පන්නන් කරන අඟනෝ කාටත්                   සරියා 
මට පැදුරක පන් දෙනවද                       තුන්හිරියා  

අහුරු අල්ලමින් අග මුල කපා                      ගෙන 
දෙපේළියේ පන් මැඩලා කපා                      ගෙන
සිවු මුල්ලෙන් එක් මුල්ලක් පුරා                   ගෙන
පැදුරක් වියමි මේ මුළු තුන් ලොව                 වටින 

එක් වෙලා ගියෝ පන් උදුරන්ට                  ගියෝ 
වෙන් වෙලා ගියෝ තැන තැන විසිර           ගියෝ 
උනා වරල පිටිපස්සට දමා                          ගියෝ 
සිනා සිසී එන්නෝ පන් විලට                     ගියෝ 

 

පැල් කවි (Pal Kavi)

උණ දඬු කපන තැන උණ දඬු              රිකිල්ලා
බට දඬු කපන තැන බට දඬු                 රිකිල්ලා 
වතුර බසින තැන හොල්මන්               කුරුල්ලා 
සී පද කියන්නට කවුරුත්                   වරෙල්ලා

මන්දාරමට උඩ කෙළිනා වැහි                 ලේනී 
ගොනුගෙ පිටේ දැම්මා වැනි බර             ගෝනී  
වෙල මැද අම්බලම කාටත්                  පරවේනී 
මට තනි නැත නුඹ නාඩන්                 උලලේනී

එගොඩ කන්ද දුම් බාලා දුම්                     බින්දු 
මෙගොඩ කන්ද දුම් බාලා පිනි                 බින්දු 
පල්ලේ කැලේ මොර ඉදිලා පැණි            බින්දු 
අපි අද කියමු එළිවෙන කල් කවි              සින්දු 

මාමයි මමයි එක යායේ හාන                  කොට 
කුළු මීමෙක් එලවා ගති                     අනින්නට 
වට පිට බැලිමි ගසකුත් නැත             නගින්නට 
පිට පට ගසා නැග්ගෙමි මාමගෙ               කරට 

කිරි වැදි වැදි කිරි වැදි වැදි                 මෝරන්නා
ගොඩ ඇඳි ඇඳි ගොඩ ඇඳි ඇඳි               පුදින්නා
අඟ නැමි නැමි අඟ නැමි නැමි           බරවෙන්නා 
පැලට වෙන්න දැන් කාලය ළං               වෙන්නා

වෙළේ පැලේ මම තනියම ඉන්න              කොට 
කොක්කු රැළක් ආවා එක                      විඩේකට 
එයින් එකෙක් ඇත්නම් ඇති                     කිරීමට 
හෙටත් වරෙව් කොකුනි රුව                   බැලීමට

ඇල් හේනේ අට්ටාලේ ඉන්න                     කොට
රන්වන් ගිරව් දෙන්නෙක් කටු අත්ත                පිට 
රන්වන් ගොමරයි උන්ගේ බෙල්ල                  වට 
රන්වන් ගිරවුනේ නොතෙමී වරෙව්               ගෙට 

ගල් යායේ මල් යායේ                     කුරක්කන්
අත දිග හැර මිට මොලවන              කුරක්කන්
කැකුළු පීදිලා රුව ඇති                    කුරක්කන්
ගැහැණු මරණ පලදාවකි                 කුරක්කන් 

(චතුරිකා ජයංගනී එවූ කවියකි.)